趁短假期寫篇短文，分享最近幫人安裝 5G 家居寬頻 router 的經歷。
Ham radio 借道 Internet ，突破地域阻隔以增加玩味也早已成事。
近月各流動電訊商 (Telco) 大推 5G 家居寬頻，月費號稱低至 $88。有長輩家中寬頻合約到期，sales 不停致電催促續約，話要考慮一下就即多謝長期惠顧可按現價續，咁咪即海鮮價，望俾 d 意見。
我話現價都係貴，幫親左咁耐 ISP 方早已回本。月費只應向下調，仲要侷你要 d 無野好睇既串流平台。睇之無味，又不能棄之減低收費，佢地話呢 d 叫送…
再者，有 d plan 速度去到 500M / 1G。其實家居有乜需求用到這個速度 ? 就算 YouTuber 開 live 直播都唔需要呢個速度。
遂幫忙問一下這些 5G 家居寬頻詳情，比較一下各方案。重點：
- 最低價 $88 只適用於公屋/居屋，另加 $18 行政費。不同 Telco 每月流量不同在 110G-300G 之間。過後按網絡使用公平原則可能向下調低速度。
- 非公屋/居屋，月費約 $12X-$14X 。有 d 係無限流量，有d 有限制。
- 7日試用期。唔滿意可退回 5G router 作罷。收 $100 sim card 費。
- 2 年約完約唔續要歸還 router，30 個月約則無需。2年半後，這些 router 都是舊技術的了。無需為個 router 而簽長約。
- 有 d 在合約期內可轉兩次地址，有 d 則無此限。有這古怪安排估計是避免家用變商用，又或基站容量不足，要預計客量。但也有說是所用 router 型號的限制。
- 無需捆綁其他無謂服務，如串流平台
- 光纖入屋的方案是有速度保證，但 5G 家居寬頻沒有，也說不出 min 速度係多少
- 個 5G Router 有 Lan Port，可供沒 Wi-Fi 的電腦接線使用
- 有一供應商標榜其頻段最多。係無錯，但不是 mobile 流動使用下，在固定地方使用。這種優勢作用不大
我對 5G mobile 的看法是和 n 年前的曲面顯示屏一樣：先有這種技術再想怎樣將之變為商品。
流動通訊，一般人 4G/LTE 已很足夠用了。有幾多人要 mobile 收發幾百 M data ？ 講白 d， 5G 我認為係一個滯消產品。然而 Telco 投資了不少，當然希望盡快普及
應用，增加收入。
5G 家居寬頻應運而生。
最後 order 一 set 無地址限制的方案。拿回家初步測試一下，set 回人家已用的 Wi-Fi SSID，好讓一到就 plug & play。
安裝簡單，只插入 sim card，上電。如用預置的 SSID，更只需掃描機底的 QR code 就 ok。殘廢餐之極。
用 speedtest 測試一下上網速度，Downlink 由 137Mbps 至最高近 300Mbps，視乎離 router 距離。平均都可達200M。Uplink 則只得約十份一，在 10M-27M 之間。
比我用緊的光纖入屋月費平 1/3，downlink 速度快起碼一倍。
光纖入屋方案的剩餘所謂優點就是速度保証，上下同速。
之後在長輩家中安裝再試，速度相若。長期，客戶一多是否一樣未知。
總結
近日傳出某沒有 Telco 牌照的互聯網服務供應商 (ISP) 有意買盤，在試了 5G 家居寬頻方案後終明所以。
有線沒落，無線興起。重演家居電話被一人一部手機取待之路。
另在和 sales 聯絡交收時需在地鐵沿線交收。我覆不如在佢地 d 街舖交收。點知對方說優惠只限網上銷售渠道，店舖交收要收正價。他轉頭講解合約內容時，會轉回用公司電話並錄音，保証不是艇仔公司。
到交收時，和那個著住 Telco 制服拖住一喼 router 遊地鐵河的哥哥仔吹下水，謂你他 d 街舖都唔馳點做落去。對方笑騎騎答”係”。
5G 技術，既搞掂了服務單一的 ISP，也令一些街舖走向關門大吉之路。
最後，我要強調我只是一個顧客，不是 sales。以上是我的經歷。歡迎留言討論內容，但不要問 plan 問價，邊間好等。我沒有額外資料可提供。
